KINDERLIEDER
- für meine beiden Nichten gedichtet -
D`Schneeflocke
Vom Himmel abe tanzed sie,
ganz viel ufs Mal hei-ei!
Sie decked alles zue ganz wiiss,
s`Gras und jede Stei!
Äs paar sitzed uf`s Autodach,
diä andere höch uf`s Huus,
alles gseht ganz anderscht us,
mä chunnt fascht nüme druus!
Flüüged nur no lang durch d`Luft
mier wänd`s dä ganz Tag gseh;
wirbled, wirbled wiiter so,
no meh, no meh, no meh!
Dä Abigstern
Lueg emal am Himmel det,
wer zwinkeret eus zue?
Dä Abigstern ganz wiit ewägg
i sinere grosse Rueh.
Chumm mier schicked ihm es Gschänk
vo eusem Ärdestern.
Vieli tuusig Liebi Grüess!
Mier Mänsche händ dich gern!
De Räge
Du luschtige Räge, du fröhliche Fründ,
machsch so schöni Musig
für d`Ärde und d`Chind!
Wänn d`Wulche ganz grau sind
dänn isch es gli Ziit-
für`s erschte Tröpfli
vo obe här wiit.
Es zweits chunnt grad abe,
es dritts no dezue,
jetzt wärded mer nass-
s`ische verbi mit de Rueh!
Wänn d`Schirm alli ufgönnd
und mier drunder stönd,
tönsch du no viel schöner
als mier singe chönnd!
D`Liebi
Wänn d`Liebi us mim Härze chunnt
isch d`Wält so wiit und riich
Das isch e sones grosses Glück
Für d`Mänsche, dich und mich!
Häsch ghört, dä Wind verzellt`s
Und d`Sunne weiss es au
D`Bäum verstönd das immer scho
Sie känned s` Gheimnis gnau.
Mier flüschteret`s dä Tier is Ohr
Sie freued sich so fescht
und Blueme - lueg! - sie strahled all
Es isch es riesigs Fäscht!
Wänn d`Liebi us mim Härze chunnt
Isch d`Wält so wiit und riich
Das isch e sone grosses Glück
Für d`Mänsche, dich und mich!
Än Traum
Wänn d`Wulche flüüged
am Himmel obe,
dänn träumt`s i mier
en schöne Traum,
vome Garte, ganz voller Friede
miteme grosse schtarche Baum.
Dä Baum isch ganz
voller wiisse Blüete;
sie strahled hell und wunderbar,
zoberscht obe da singt en Vogel,
s’isch gar kein Traum,
s’isch alles wahr!